عمر نجم
مش عارِفِ الليلْ والَّا شَأْشَأَةِ القَمَرْ
خَلْفِ الشجرْ،
والجوّ باردْ زمهريرْ،
نبهْ عيونِي واتْفَزَعْت — لعلُّه خيرْ.
الدُّوح على الصَّفِّينْ تجمَّدْ وانْبَهَمْ،
اللُّوحَة مَرْسُومَة بأَلَمْ،
وخُيوطها منقوشَة ونَحيلة زيِّ بيتِ العنكبوتْ،
وِسْط السَّما،
وورَاها نُورِ البَدْر شاشَة
قُولْ غُلالَة مُبْهمة،
يا للي نسجتِ الخيطْ ومنِّيت الفُؤادْ بالمُسْتحيلْ،
قلتْ ليه الكونْ جَميلْ؟
يعني علشانِ البَشَرْ
يِتْلهو بسحْرِ القَمَرْ،
يَنْسوا إن النور وراهْ محزونْ عليلْ.
إيه اللي فكَّرْني بعمر؟
كَانْ حِلْم عايزْ يكتملْ
والَّا اكتملْ؟
كان الحقيقة والَّا كان همسةْ خيال
زيِّ الأمَلْ؟
كان مُوجَة تايهَة في بَحْر هايِجْ قَلْبُه مَايِجْ،
والشُّطوط تِرْمي لشطُوطْ،
كان قوقعَة في إيدْ أخْطبُوطْ،
جُوَّاها لُوليَّه بَنَاها من خيالُهْ،
حمِّلها هَمُّه وكلِّ ما لُهْ،
وتَركْها تتدحْرجْ على أرضِ المُحيطْ.
أنا ليه أخافْ مِ الأخطبوطْ
أنَا مِ البَشَرْ
هيَّ دِراعاتِ الوحوشْ ح تَهِزِّني
وانا قَلْبي فيه مليونْ دِراعْ،
وعيني أحلام القمَرْ.
إيه اللي فكَّرني بعمر؟
