المشهد الثالث: الحوار بثلاث كلمات
الشرطي
:
أدخل الموجودين برَّة؟
(المحقق يشير بالإيجاب، ويخرج الشرطي ويعود بمصاب يقطر دمًا ورجل أنيق.)
المحقق
(لمن يقطر
دمًا)
:
أنت جزار بالمدبح؟
المصاب
:
أنا مدبوح بمستشفى.
المحقق
:
اشرح الموضوع باختصار.
المصاب
:
أنا خرجت الفجرية.
المحقق
:
الفجرية؟ تعمل إيه؟
المصاب
:
أروح الجامع للصلاة.
المحقق
:
ونِعم بالصلاة! وبعدين؟
المصاب
:
صدمني أوتوبيس كالوحش.
المحقق
:
وحصل لك إيه؟
المصاب
:
ارتجاج مخ ونزيف.
المحقق
:
وبعدين؟ عملت إيه؟
المصاب
:
لقيت نفسي بمستشفى.
المحقق
:
وهناك أسعفوك بالعلاج.
المصاب
:
رموني لعدم الاختصاص.
المحقق
:
وطلباتك إيه دلوقتِ؟
المصاب
:
يخرجوني لمستشفى مختص.
المحقق
:
اخرج! حد حايشك!
المصاب
:
حايشني حضرة المحترم.
(يشير إلى الرجل الأنيق.)
المحقق
:
وحضرته يبقى مين؟
المصاب
:
حضرته موظف بالمستشفى.
المحقق
:
حايشه ليه يا حضرة؟
الموظف
:
لا بد إذن المدير.
المحقق
:
وأين حضرة المدير؟
الموظف
:
يحضر قبل الظهر.
المصاب
:
وأنا مرمي أنزف.
المحقق
:
من الفجر للظهر؟!
المصاب
:
يعجبك الكلام ده؟!
المحقق
:
وإذا أخرجته أنت؟
الموظف
:
أنا غير مختص.
المحقق
:
ويجرى إيه يعني؟
الموظف
:
يبقى ضد اللوائح.
المحقق
:
يعني تتركه يموت؟!
الموظف
:
أنا منفذ لوايح.
المصاب
:
وأنا أعمل إيه؟
المحقق
(للمصاب)
:
قدامك شيء واحد.
المصاب
:
قل لي أرجوك.
المحقق
:
أحسن شيء تموت.
المصاب
:
أنا اللي أموت؟!
المحقق
:
تموت وتعيش اللوائح.
الموظف
:
هذا هو الحل.
المحقق
:
مضبوط هذا الحل!
الموظف
:
ومطابق للعمل الجاري.
المصاب
:
يعني طلعت غلطان!
الموظف
:
وتهجمت على الإدارة.
المصاب
:
أنا متأسف وأعتذر.
الموظف
:
المرة التانية اصبر.
المصاب
:
لغاية ما تطلع روحي.
الموظف
:
بدون شوشرة فارغة.
المصاب
:
ومع الخضوع للوائح.
الموظف
:
تمام، فهمت دلوقتِ؟
المصاب
:
ودلوقتِ أموت هنا!
المحقق
:
هنا ممنوع قطعيًّا.
المصاب
:
أمال أموت فين؟
المحقق
:
هناك في المستشفى.
الموظف
:
تفضل ارجع هناك.
المصاب
:
وهنا يجرى إيه؟
المحقق
:
قلنا هنا ممنوع!
الموظف
:
استمارتك هناك بالمستشفى.
المصاب
:
يعني رجوعي ضروري.
الموظف
:
ووجودك بالحالة السابقة.
المصاب
:
مرمي في الدهليز.
الموظف
:
لغاية تشريف المدير.
المصاب
:
وإذا غاب النهارده؟!
المحقق
:
كفاية وجع دماغ!
المصاب
:
مجرد سؤال بسيط!
المحقق
:
سؤال تحصيل حاصل.
المصاب
:
إذا غاب المدير؟!
المحقق
:
تكون إنت مت.
الموظف
:
شيء بديهي يا أخي.
المحقق
:
تفضل خده وخلصنا.
الموظف
:
هو يرجع بنفسه.
المحقق
:
ربما يكون تعبان.
المصاب
:
فعلًا أنا منهار.
الموظف
:
أنا غير مسئول.
المحقق
:
انقله في سيارتك.
الموظف
:
كما هرب يرجع.
المصاب
:
دي سيارة المستشفى.
الموظف
:
ممنوع استعمالها لحالتك.
المحقق
:
دي حالة استثنائية.
الموظف
:
اللائحة تمنع الاستثناءات.
المصاب
:
واللائحة تمنع التصرف؟!
المحقق
:
رُد على سؤاله!
الموظف
:
أنا منفِّذ فقط.
المصاب
:
وأنا قتيل هنا.
الموظف
:
لا بد تكون هناك.
المحقق
:
مفروض تستلمه حي؟!
الموظف
:
بحالته السابقة بالضبط.
المحقق
:
وإيه حكمتها دي؟
الموظف
:
لأنه مُعتبَر عهدة.
المحقق
(للمصاب)
:
سامع؟ إنت عهدة.
المصاب
:
وإذا اختفت العهدة؟!
الموظف
:
تبقى هناك مسئولية.
المصاب
:
عليكم. وأنا ما لي!
الموظف
:
إنت لازم ترجع.
المحقق
:
رجع يحصل إيه؟
الموظف
:
ينتظر حضور المدير.
المحقق
:
وإذا حضر المدير؟
الموظف
:
نسلمه إذن الخروج!
المصاب
:
أنا خرجت وخلاص.
الموظف
:
خروجك غير قانوني.
المصاب
:
يعني لازم أدخل؟!
المحقق
:
علشان تخرج تاني.
المصاب
:
بشهادة خروج رسمية!
المحقق
:
أو بشهادة وفاة ممضية!
المصاب
(للمحقق)
:
وإنت إيه رأيك؟
المحقق
:
لا بد من الخروج!
المصاب
:
خروجي من هنا؟!
المحقق
:
خروج عقلي أنا!
(المحقق يضغط على زر الجرس فيظهر الشرطي.)
الشرطي
:
حضرتك ضربت الجرس!
المحقق
:
وصَّل حضراتهم للباب.
الشرطي
:
تفضل حضرتك وحضرتك.
(يقودهما إلى الخارج.)
المحقق
:
دماغي، دماغي، دماغي.
(يضع رأسه بين كفَّيه.)
(ستار)
