العودة
يجعل صباحكم نادي
يا ساكنين الوادي …
ردوا عليَّ السلام …
دانا بنادي …
خمس سنوات!
…
ما حضنتشي عيني النوم
ما حضنت عايدة يوم
ولا أولادي …
ولا دقت مية بلادي،
ولا اتهنيت بحلم أخضر،
ولا اتغطيت بتوب الود،
على قد ما حبيت الناس …
…
أنا قلبي عصفورة مكسورة الجناحين،
والبين مخربشها …
الدنيا ملهية وقلوب الناس مطوية
بليل الهم …
والدم يجري في جسمي
كنه ما بيجريش دم!
لكنها قامت وحامت فوق جبال المحبة
الحبة تطرح حبة تبقى مليون حبة
والدنيا تصبح شمس بتدفي
يا عيون حبيبي اللي بانت شهد متصفي
يا عاشقين النبي صلوا عليه …
…
الورد كان شوك من عرق النبي فتح
وأنا فتحت من ريحة عرق حبيبي
شميته في نسمة النيل البليلة
وخضرة الغيط اللي مترامي قدامي
على الآخر …
وفرحة القطر اللي جاري على الجيزة
وضحكة الناس الغلابة
أنا قلبي يابه مليان حنية
ونفس جنية تفتحه وتشوف
حبي اللي عطشان بقى له زمان
ومكسوف …
لأهلي وأولادي
بلدي وأصحابي وأرض أجدادي
وبنت مستنية بالحنة في إيديها
والحنية في عينيها …
وعنيَّا من حبها بتقول كلام ليها
ماجريش على فم
راحت ليالي الهم
وهلت ليالينا …
