بيانات على تذكرة مسجون

• الاسم: صابر.
• التهمة: مصري.
• السن: أصغر سن عصري،

  رغم انسدال الشيب ضفاير ضفاير،

  من شوشتي لما لتحت خصري.

• المهنة: وارث عن جدودي والزمان

  صنع الحضارة والنضارة والأمان.

• البشرة: قمحي …
• القد: رمحي …
• الشَّعر: أخشن م الدريس.
• لون العيون: أسود غطيس.
• الأنف: نافر كالحصان.
• الفم: ثابت في المكان،

  ولما جيت أزحزحه عن مطرحه، كان اللي كان.

• جهة الميلاد: في أي أرض مضلمة،

  تحت السما … على أرض مصر،

  من أي دار وسط النخيل،

  مطرح ما يجري النيل،

  ما دام ما يكونش قصر …

• الحكم: من سبع تلاف سنة … وأنا

  راقد سجين … اطحن على ضراسي الحجر،

  من الضجر، وابات حزين.

• الإفراج: سألني سائل حبستك طالت … وليه؟

  لأني طيب، وابن نكتة، وابن ايه.

  مفيش مخالفة ركبتها ضد القانون،

  لأني خايف، والقانون سيفه في إيديه،

  تسأل عليَّا المخبرين،

  في أي حين،

  تسمع وتفهم قصتي ألف وبيه.