حديث غرامي بين سعدون الفحل وزوجته الدون وهم على حصير النوم يتسامرون | فِلح وسلاطين

سعدون : يا مرَة اهمدي … دنيا كلها حتحفظ اسمي «سعدون الفحل أبو راسين» … والناس حتعرف قيمتي!

الزوجة : ولا حد عارف قيمتك زيِّي.

سعدون : افهميني … أنا خلاص سمنت على القفص، صعب تحشريني دلوقتي فيه وتقولي لي بيض!

الزوجة : هو اللي دخل في مخك الزناخة دي … هو من حقِّه يحلم يبقى حاكم وسلطان … لكن أمثالنا مالهمش إلا الأرض … سيبك من أفكاره.

سعدون : أنا ليَّ أفكاري المستقلة … أنا مش إمَّعة.

الزوجة (متباكية) : يا حسرة على بختك يا أم العيال! … العاقل مايدخلش الزريبة والتيران بتتناطح يا سعدون … أولادك وغيطك عايزينك.

سعدون : آن الأوان أبقى حاكم يا ولية.

الزوجة : ح تجري ورا مشكاح … وريما ما لها إلا النواح (تبكي).

سعدون : أنا ح ادخل التاريخ من باب الحرس المزنهر … عايزة تعلقي المحرات في رقبتي طول النهار. وتعلقيني في ساقيتك طول الليل؟! … بصِّي … أهُم واقفين جاهزين … أول ما أبدأ مغامراتي … حيحكوا حكاياتي … وتلاقي اسمى زي الجوهرة على صدر باب التاريخ.

الزوجة : والتاريخ ده بقى اصطبل والَّا زريبة؟

سعدون : يا جاهلة … التاريخ كله كتب … ياما قرالي … وسمَّعني حكايات … اللي تقتل من الرعب … واللي تموت من الحزن … واللي تفطَّس من الضحك.

الزوجة : حياخدك يقتلك في التاريخ … يا سبعي!

سعدون : يا هبلة … لو كنتي معانا لما دخلت خلوته … ياه! … مش ح تصدقي طبعًا … كان معاه كل الصناديد في نص الليل.

الزوجة : بسم الله الرحمن الرحيم … عفاريت؟

سعدون : ماتفسريش … دول الأبطال وأرواحهم بتجتمع عنده كل ليلة يتشاوروا في أحوال الدنيا.

الزوجة : أوعى يكون حد منهم لمسك!

سعدون : يلمسوني أنا؟ … وهمه بيكلموا أمثالي؟ … أنا ماشفتش غير دمدمة … كانوا بيتكلموا سرياني، وبيدبروا إزاي نغلب الساحر سقردول … وحواليهم خرايط وكتب وجزاير وطوابي … وخطط حربية … ودخان … أنا اترعبت.

الزوجة : يا خرابي! … مصيبة ليطلعولنا … هنا!

سعدون : يا شيخة تفِّي من بقك … دول ملوك.

الزوجة : والنبي دول عفاريت.

سعدون : ماتفسريش في وشِّي … سامعة! (أصوات أقدام.)

الزوجة : يا لهوي! … رجلين معزة … كله منك!

سعدون : إنتي اللي فسَّرتي … ليلتك سودة!

الزوجة : دستور يا أسيادي … قوم شوف مين.

سعدون (يشخر) : أنا نايم.

صوت : سعدووون …

الزوجة : بينادوا عليك … اخرج لهم … مايدخلوش هنا.

سعدون : قولي لهم أنا نايم.

الزوجة : أنا عريانة يا سعدون.

سعدون : وانا حافي.

الزوجة : عفريت يا سعدون … الحق!

سعدون : وانا مين حيلحقني! … أنا ميت.

شحاتة : إيه جرى يا اولاد؟ … إنتم خايفين؟

سعدون : الرحمة يا شمهورش!

شحاتة : سعدووون …

سعدون : نعمييين.

شحاتة : ألا تعرفني؟

سعدون : اللي ما يعرفك يجهلك يا ملك الجان.

شحاتة : لا تترك الشك يُفسد عقلك يا سعدون … اجعل إيمانك يملأ قلبك … انهض … وكن رجلًا يليق بصحبة الفوارس … لقد آنَ الأوان … لندق أبواب التاريخ.

سعدون : سيدي شحاتة البشبوري؟!

شحاتة : سيف بن ذي يزن.

الزوجة : يا مصيبتي! … يقطعك يا سي شحاتة بيه! عامل في روحك كده ليه؟!

شحاتة : نسيت يا سعدون؟ صار شحاتة ماضيًا.

سعدون : وحياتك افتكرتك عفريت!

الزوجة : ما هو منهم.

سعدون : اخرسي يا مرَة … وادخلي جوه … (يقلِّد سيِّده) عندما يتكلم الفرسان تسكت النسوان.

الزوجة : يكون في علمك لا سفر ولا خروج … شي الله يا تاريخ … لا التاريخ بيطعم جعان ولا يكسي عريان (تخرج).

سعدون : امشي يا مرَة يا جاهلة … واعذرني لأني ماشفتش فرسان قبل كده … لكن دلوقتي حاسس إننا حنهد الدنيا ونبنيها تاني … والَّا مانبنيهاش مش مهم … لأني حاسس أن كل اللي ف نافوخك حيتحقق.

شحاتة : هكذا كتب في التاريخ … سنحرر «شامة» ليكون العدل شريعة والخير مشاع.

سعدون : بس أنا خايف!

شحاتة : من أي شيء؟ … إنت معي.

سعدون : وانا إيه؟ … حتة فلاح ماقتلش فار في حياته … ده كله خيال.

شحاتة : لن يظل خيالًا … وستكون لك طابية حقيقية في مملكة حقيقية … آمن وسيكون الحلم حقيقة.

سعدون : وهل يكون لي شعب حقيقي … أحكم وأتحكم فيه؟

شحاتة : طبعًا … شعب من الصنَّاع والفلاحين … والنساء … والعسكر.

سعدون : واللصوص … والدكاكين؟ والصعايدة؟ والعثمانلية؟

شحاتة : لا … لن يكون هناك عثمانلية بعد اليوم … سنطردهم أو نقتلهم.

سعدون : الله أكبر! زي ما يكون كل شيء حصل! أكيد … إنت بتضحك على دقني!

شحاتة : سعدون … أنا سيف بن ذي يزن التبعي اليمني … سيد الفرسان … لا، أنا لا أكذب، وهذه هي الحقيقة المؤكدة التي تقودنا إلى النصر.

سعدون : مدد … يا سي اليزل!

شحاتة : هل قبلت؟

سعدون : قبلت الطابية.

شحاتة : ومستعد للرحيل؟

سعدون : بالروح بالدم …

شحاتة : إذن هيَّا!

سعدون : هيَّا بنا هيَّا … نطوي الفلا طيَّا (تدخل الزوجة).

الزوجة : على جثتي وجثث عيالي!

سعدون : يا مرَة ماتحرجنيش قدام سي اليزل!

الزوجة (تتركه لتأخذ بخناق الفارس وتهزُّه) : سي اليزل؟ خيبة أمل! سايق الهبل! عملنالك إيه يا راجل انتَ عشان تجنن اللي مالناش غيره … حرام عليك حُرمت عليك عيشتك!

شحاتة (في هدوء وهي تطوِّحه) : مسكينة وجاهلة، ويجب أن نغفر للفقراء … الفقر قاسي يا سعدون … جفَّفَ قلبها فأصبحت عمياء لا تبصر الحقيقة.

الزوجة : أنا عميا يا عديم النظر!

شحاتة : كل هذا من فِعل الساحر الكهين يا سيدتي … ولكن اطمئني فسنحرركِ أنتِ أيضًا.

الزوجة (باكية) : سيبنا في حالنا … اعمل معروف … لا ترملني ولا تيتم عيالي!

سعدون : خلاص … أرجع وانا حاكم طابية وحيبقى ولادك وزرا وانتِ سلطانة.

الزوجة : يا سعدون عيالك محتاجين لك فلاح!

سعدون : العالم محتاج لي أكثر (ينفلت ويخرج وراء فارسه فتصرخ في يأس).

الزوجة : ملعون أبو العالم … أولادك أحق بيك … الأرض عايزاك وعايزة محراتك. يا سعدون اللي ماعندوش مروَّة يسوق محرات إزاي يحكم مدينة … عقَّلوهم يا ناس … لو كان عندكم ذرة عقل … ماكنتوش تتفرجوا على خيبة أكبر منها خيبتكم. وماكنتوش تضحكوا على مصيبة أهون من مصيبتكم … فوقوا يا ناس … تخاريف الراجل ده حتهد الدنيا على دماغه وعلى دماغكم … زي ما هدَّت بيتي على دماغي.